"Банк ЦентрКредит" АҚ Қазынашылық департаменті компаниялардың валюталық тәуекелдіктерін оларды хеджирлеу жолымен төмендетуді ұсынады.

Сыртқы сауда-саттық операцияларымен айналысатын компаниялар (экспорттаушылар мен импорттаушылар) бүкіл әлемде халықаралық және ішкі валюталық нарықтың белсенді қатысушылары болып табылатыны баршамызға мәлім.

Нарықта валюта бағамы үнемі өзгеріп отырады. Мұның нәтижесінде валютаға сатылып алынатын немесе сатылатын тауардың нақты құны айтарлықтай өзгеруі мүмкін және бастапқыда тиімді болып көрінген келісім-шарттың нәтижесі шығынға әкеліп соғуы мүмкін.

Бұдан құтылудың жолы бар ма? Әрине бар.

Компаниялар үшін жағымсыз валюталық тәуекелдіктерді төмендетудің көпшілік мойындаған әдісі олардан сақтандыру немесе хеджирлеу болып табылады.

Валюталық тәуекелдікті хеджирлеу (сақтандыру) дегеніміз – компанияның қаражатын валюта бағамының жағымсыз қозғалысынан қорғау, оның мәні – валюталық нарықта мәміле жасау арқылы осы қаражаттың ағымдағы құнын бекіту.

Валюталық тәуекелдіктерді хеджирлеудің кең тараған құралдары – валюталық форвардтық және опциондық келісім-шарттар.

Валюталық форвардтық келісім-шарт – бұл сатушы мен сатып алушы болашақта нақты бір күнде базистік актив – валютаны белгілі мөлшерде жеткізуге келісетін мәміле.

Егер Сіз экспорттаушы компания болсаңыз және Сізге ағымдағы шығыстарды (шикізат, жалақы және т.б.) теңгемен төлеу қажет болса, онда ол үшін Сіз валюта түсімін ішкі нарықта сататын боласыз. Шетелдік валюта бағамы төмендеген жағдайда, Сіз шығынға ұшырайсыз. Бұндай жағдайда Банкке сататын доллардың бағамын алдын ала белгілеу үшін Сіз Банкпен форвардтық валюталық келісім-шарт жасайсыз. Импорттаушы үшін де ұқсас жағдай, тек осы жағдайда ғана шетелдік валюта бағамының өсіп кету тәуекелдігі хеджирленеді.

Валюталық опцион деп валютаны белгілі бір уақыттан кейін нақты бағаға сату немесе сатып алу міндетін емес, құқығын айтамыз.

Форвардтық келісім-шартты қолданған кезде Компания өзін бағамның жағымсыз өзгерісінен туындайтын шығыннан қорғайды, бірақ жағымды өзгерісінен де ұтпайды. Валюталық опцион бұл мәселені шешуге мүмкіндік береді. Валюта бағамының өзгерісі жағымды болған жағдайда, Сіз опционды орындаудан бас тарта аласыз және ағымдағы бағам бойынша валютаны сатып алуыңызға болады.

Толығырақ мәлімет алу үшін бізбен мына телефондар арқылы хабарласуыңызға болады (727) 2598-585, 2443-089 (Дилинг басқармасы).