Пресс-релиз

Алматы, 2019 жылғы 17 мамыр

ЦентрКредит Банкі OpenAPI технологияларына негізделген революциялық ашық қаржы платформасын іске қосты. Бұл платформа әлеуетті серіктестердің дайындық процедураларына ұзақ уақыт жұмсамай, Банкпен интеграция жасауына және серіктес-компания мен Банктің ортақ клиенттері үшін инновациялық сервистер жасауына мүмкіндік береді.  

Бұл инновация өз бағдарламалық қосымшаларын әзірлеген компаниялар үшін өзекті болады. Мысалы, клиенттер ЦентрКредит Банкінің серіктесінің қосымшасына кіріп, қаржы институтына бармай-ақ, нақты уақыт режімінде ақша аударымдарын, төлемдер жасай алады, шоттарын басқара алады, шот бойынша үзінді көшірме, валюта бағамдары, ЦКБ бөлімшелерінің мекенжайлары туралы ақпарат ала алады.

Ашық платформаны тестіден өткізуге және Банк әзірлеушісінің порталына кіріп, бизнесті жүргізу үшін қажетті сервистерді таңдауға болады. https://developer.bcc.kz сайтында бір рет тіркеліп, OpenAPI қосылу үшін қажетті құжаттардың тізімімен және техникалық сипаттамалармен танысуға болады.

«Ашық платформалардың бағыты – еліміздің қаржы секторын дамытудың өте маңызды құрамдас бөлігі», – дейді ЦентрКредит Банкінің басқарушы директоры Нұрлан Сәрсебеков, – «оның базасында банктер дәстүрлі банкинг моделінен арылып, өз қызметтерін BaaS/BaaP парадигмасына ауыстырып, ортақ клиент үшін сапа мен жайлылыққа бейімделген онлайн-сервистерді дамытуға түрткі бола алады».

OpenAPI сервистерін ендіру және тестілеу бойынша жұмыстарды Банк 2018 жылдың басында бастаған болатын.

2018 жылғы маусымда ЦентрКредит Банкі әзірлеушісінің https://developer.bcc.kz порталында Қазақстандағы бірінші Ақпараттық API сервисі іске қосылды. Ол  бөлімшелер/банкоматтар желілерінің мекенжайларын, банкоматтардың жұмыс істеуге қабілеттілігін, валюта бағамдарын нақты уақыт режімінде қарауға мүмкіндік береді. 

2018 жылғы қазанда Астана қаласында өткен «Цифрландыру: жаңа мүмкіндіктер уақыты» атты конференцияда ЦентрКредит Банкі алғаш рет OpenAPI технологиясы базасындағы жаңа шешімді ұсынып, ҚР-дағы қаржы қызметтерінің дамуына жаңа импульс берді.

2018 жылғы қарашада Қазақстан Республикасының Ұлттық Банкінің белсенді қолдауымен теңгемен ашылған шоттарды басқару (төлемдерді құру, Банктегі шоттарды қарау және т.б.) бойынша бірінші төлем сервисі – Financial API іске қосылды. 2019 жылдың басында сервис валюталық шоттармен жұмыс жүргізу және ақша айырбастау қызметтерімен толықтырылды. Қанатқақты жоба Астана Халықаралық қаржы орталығымен бірге іске қосылған болатын, қазіргі уақытта АХҚО-ның қажеттіліктері мен міндеттеріне сәйкес Financial API қызметтері кеңейтіліп жатыр.

Сондай-ақ Банк қазіргі уақытта OpenAPI ашық қаржы платформасы базасында тағы бірнеше сервистердің қанатқақты жобасын жасау бойынша жұмыстарды жүргізіп жатыр: 

Credit API – ЦентрКредит Банкі серіктестерінің сауда орындарында клиенттерге кредит беру процесіне дәстүрлі көзқарастан ерекшеленетін процесті құруға мүмкіндік беретін біріктіруші сервис;

Payment API – Банктің серіктестері мен клиенттеріне төлемдерді қабылдау және жүргізу бойынша көптеген мүмкіндіктер беретін біріктіруші сервис.

«Қазіргі заманда технологиялар қарқынды дамуда және Банк клиенттерінің талаптарына сәйкес келу және сапалы әрі сенімді қызмет көрсету үшін біз олардан қалыспауымыз қажет. Біз ашық қаржы платформаларына өту қажет екенін түсінеміз, бұл – әлемдік тенденция және біз оған дайынбыз. Оған қоса, бұл бастама «Цифрлы Қазақстан» атты ҚР мемлекеттік даму бағдарламасына қосылған және оған Қазақстан Республикасының Ұлттық Банкі белсенді түрде қолдау жасап жатыр. OpenAPI – бұл клиенттер үшін жайлылықпен қатар, нарықтағы жағдайды өзгерте алатын және жалпы экономиканың дамуына үлес қоса алатын құралдардың бірі», – деп атап өтті Банктің Басқарма төрағасы Ғалым Хұсаинов.