2018 жылғы 14 наурыздан бастап "Банк ЦентрКредит" АҚ пен "Цеснабанк" АҚ үлестес және байланысты тұлғалар болып табылмайды.
"Банк ЦентрКредит" акционерлік қоғамының (бұдан әрі – банк) баспасөз қызметі банктің жай акцияларын сатып алу-сату мәмілесі жасалғаны жөнінде мәлімдеді.
Банктің орналастырылған жай акцияларының жалпы санының 29,56% үлесін құрайтын "Цеснабанк" акционерлік қоғамына тиесілі болған жай акциялардың барлық пакеті "Банк ЦентрКредит" АҚ-тың ірі қатысушылары Байсеитов Бақытбек Рымбекұлына, Ли Владислав Сединовичке және жеке тұлғалар (миноритарлы акционерлер) тобына сатылды.
– Жасалған мәміленің нәтижесі бойынша Бақытбек Байсеитовтің үлесі банк орналастырған жай акциялардың жалпы санының 48,07%-ын, Владислав Лидің үлесі банк орналастырған жай акциялардың жалпы санының 10,05%-ын құрады, - деп хабарлады банк басқармасының төрағасы Ғалым Хусаинов.
Осыдан бұрын банк 2018 жылғы 15 ақпанда ұсынған хатында Қазақстан Республикасы Ұлттық Банкінің Ли Владислав Сединовичтің банктің ірі қатысушысы мәртебесін алуына келісім бергені жөнінде мәлімдеген болатын.
Бұған қоса банк банктің Директорлар кеңесінің 2017 жылғы 20 желтоқсандағы №223 қаулысының негізінде жарияланған "Банк ЦентрКредит" АҚ-тың жай акцияларына айырбасталатын артықшылықты акцияларын банктің бастамасымен сатып алу процедурасының аяқталғаны туралы хабарлады.
Осылайша, 2018 жылғы 14 наурыздағы жай-күйі бойынша банктің артықшылықты акцияларының 39 044 841 данасы сатып алынды, оның ішінде "Цеснабанк" АҚ-тан 8 366 560 дана акция және "Цесна" қаржы холдингі» АҚ-тан 27 067 109 дана акция сатып алынды.
Банктің ресми хабарламасында: "2018 жылғы 14 наурыздан бастап "Банк ЦентрКредит" АҚ пен "Цеснабанк" АҚ үлестес және байланысты тұлғалар болып табылмайды», – деп көрсетілген.
"Банк ЦентрКредит" акционерлік қоғамы 1988 жылғы 19 қыркүйекте құрылған және Қазақстанның ең алғашқы коммерциялық банктерінің бірі болып табылады. Банктің республика бойынша кең тараған филиалдық желісі бар және өзінің 100-ден астам филиалдары мен бөлімшелерінде заңды және жеке тұлғаларға қызмет көрсетеді.
Қосымша ақпарат алу үшін "Банк ЦентрКредит" АҚ-тың баспасөз қызметіне хабарласуды өтінеміз. Байланыс телефондары: +7 727 2598603, +7 727 2443048. asel.durbaeva@bcc.kz, irina.vassilets@bcc.kz, www.bcc.kz