Валюталық заңнамадағы өзгерістер
«Банк ЦентрКредит» АҚ-тың құрметті клиенттері!
Сіздерге ҚР Ұлттық Банкі валюталық операцияларды жүзеге асыру, экспорттық-импорттық валюталық бақылауды жүзеге асыру, валюталық операцияларды мониторингтеу жөнінде жаңа қағидаларды бекіту бойынша бірнеше қаулылар қабылдағанын және олар 2019 жылғы 1 шілдеден бастап қолданысқа енгізілетінін хабарлаймыз.
Атап айтқанда келесі қаулылар қабылданды:
1) «Қазақстан Республикасында валюталық операцияларды жүзеге асыру қағидаларын бекіту туралы» ҚР Ұлттық Банкі Басқармасының 2019 жылғы 30 наурыздағы № 40 қаулысы.
Қазақстан Республикасында валюталық операцияларды жүзеге асыру қағидалары резиденттердің және бейрезиденттердің Қазақстан Республикасында валюталық операцияларды жүзеге асыру тәртібін айқындайды.
Қағидаларда:
- валюталық операциялар бойынша төлемдерді және (немесе) ақша аударымдарын жүзеге асыру;
- Қазақстан Республикасының ішкі валюта нарығында қолма-қол ақшасыз шетел валютасын сатып алу және (немесе) сату;
- банктік шот бойынша қолма-қол шетел валютасын алумен, есепке жатқызумен және пайдаланумен байланысты операцияларды жүргізу тәртібі қамтылады.
2) «Қазақстан Республикасында экспорттық-импорттық валюталық бақылауды жүзеге асыру қағидаларын бекіту туралы» ҚР Ұлттық Банкі Басқармасының 2019 жылғы 30 наурыздағы № 42 қаулысы.
Қазақстан Республикасында экспорттық-импорттық валюталық бақылауды жүзеге асыру қағидалары Қазақстан Республикасында экспорттық-импорттық валюталық бақылауды жүзеге асыру тәртібін айқындайды.
Қағидаларда:
- экспорт немесе импорт жөніндегі валюталық шарттар бойынша есептік нөмірлерді алу;
- экспорт немесе импорт жөніндегі валюталық шарттар бойынша репатриациялау талаптарының орындалуын бақылау;
- экспорт немесе импорт жөніндегі валюталық шарттар бойынша ақша қозғалысының және міндеттемелердің өзге де орындалуының мониторингі;
- экспорт немесе импорт жөніндегі валюталық шарттарды есептік тіркеуден алу тәртібі қамтылады.
3) «Қазақстан Республикасында валюталық операцияларды мониторингтеу қағидаларын бекіту туралы» ҚР Ұлттық Банкі Басқармасының 2019 жылғы 10 сәуірдегі № 64 қаулысы.
Қазақстан Республикасында валюталық операцияларды мониторингтеу қағидалары Қазақстан Республикасында валюталық операциялардың мониторингін жүзеге асыру тәртібін белгілейді.
Қағидалар капитал қозғалысы бойынша келісімшарттардың есептік тіркеу тәртібін регламенттейді.
Мониторингтеу қағидалары қолданысқа енгізілген күннен бастап тіркеу куәліктері, хабарлама туралы куәліктер өз қолданысын тоқтатады.
Көрсетілген нормативті құжаттармен Қазақстан Республикасы Ұлттық Банкінің ресми сайтында танысуға болады.