ҚР-да ЖШС-ны қайта тіркеу

Қазақстанда ЖШС-ны тіркеген кезде кәсіпкерлер заңды мекенжайын, құрылтайшылардың құрамын және т.б. маңызды деректерді көрсетеді. Бірақ қандай да бір деректер өзгерген жағдайда, не істеу керек? Мұндай жағдайда ЖШС-ны қайта тіркеу процедурасы қарастырылған.

Қазақстанда ЖШС-ны қайта тіркеу қашан талап етіледі?

Кәсіпкерлер осы заң процедурасынан келесі жағдайларда өтуі тиіс:

• Бизнесмен өз ұйымының атауын өзгерту туралы шешім қабылдаған жағдайда. Бұл филиалдарға немесе өкілдіктерге де қатысты.
• Жарғылық капиталды азайту қажет болған жағдайда.
• Серіктестікке қатысушылардың құрамы өзгерген жағдайда. Мысалы, бизнес сатылды немесе мұраға берілді. Нәтижесінде ЖШС құрылтайшысы ауысты, демек серіктестікті қайта тіркеу қажет болады.

Ал заңды мекенжайдың өзгеруіне байланысты Қазақстанда ЖШС қайта тіркелмейді. Бірақ бұл кәсіпкерге ештеңе істеудің қажеті жоқ дегенді білдірмейді. Ол заңды мекенжайдың ауысқаны туралы уәкілетті органға хабарлауға міндетті – бұған толық бір ай уақыт бар. Егер құзыретті органды хабардар етпесе, кәсіпкерге айыппұл салынады.

Ал құрылтай құжаттарына өзгерістер енгізіп, қайта тіркеуден өтпеуге бола ма? Егер кәсіпкер осындай шешім қабылдаса, ол барлық өзгерістер жарамсыз деп танылатынын есте сақтауы керек.

Сондай-ақ кейбір жайттарға назар аударыңыз:

• Егер сіз компанияның атауын өзгертсеңіз, онда жаңа мөр мен бланкілерге тапсырыс беріп, құжаттарға, лицензияға ақпарат енгізіп, жаңа маңдайша орнатуыңыз қажет. Бұған қоса, өзгерістер туралы банкті ғана емес, контрагенттерді – серіктестерді, жеткізушілерді және т.б. да хабардар етуіңізге тура келеді.
• Егер сіз жарғылық капиталды азайтсаңыз, ол туралы кредиторларға хабарлау қажет. Хабарландыру тек жазбаша түрде ғана орындалады.
• Егер сіз серіктестікке қатысушылардың құрамын өзгертіп, атап айтқанда жаңа қатысушыны енгізген болсаңыз, онда осы қатысушының салық бойынша берешегі жоқ екендігі туралы анықтама алу қажет.

ҚР-да ЖШС-ны қалай қайта тіркеуге болады?

Процедурадан онлайн әрі офлайн режимінде өтуге болады. Бірінші нұсқа күш пен уақытты үнемдеуге мүмкіндік береді. Екінші тәсіл кеңеске мұқтаж адамдар үшін қолайлы, ХҚКО мамандары барлық сұрағыңызға жауап беріп, құжаттарды ресімдеуге көмектеседі.

1. ЖШС-ны Егов порталы арқылы қалай қайта тіркеуге болады?

Егер сіз Қазақстанда ЖШС-ны онлайн түрде қайта тіркегіңіз келсе, оны Egov.kz (Егов) электрондық үкімет порталы арқылы жасауға болады. «Бизнеске», содан кейін «Сервистер» бөліміне өтіп, онда тиісті қызметті таңдауыңыз керек. Қайта тіркеу туралы өтінішке ЭЦҚ көмегімен қол қойылады.

Егер процедура сәтті өтсе, Еговтың жеке кабинетінен ЖШС-ны қайта тіркеу туралы анықтама ала аласыз. Егер қандай да бір себептермен қайта тіркеу жүзеге асырылмаса, сіз жазбаша түрде себебі көрсетілген бас тарту хабарламасын аласыз.

2. Серіктестікті офлайн қалай қайта тіркеуге болады?

Егер сіз жеке өтініш беруді таңдасаңыз, онда ХҚКО-ға баруыңыз қажет. ЖШС-ны қайта тіркеу үшін өзіңізбен бірге келесі құжаттарды алуыңыз қажет:

• Қайта тіркеу туралы шешім (шешімнен үзінді көшірмені де ұсынуға болады). Құжатта заңды тұлғаның мөрі болуы тиіс.
• Өзгертілген ақпараты бар құрылтай құжаттары (үш дана).
• «Ескі» құрылтай құжаттарының түпнұсқасы.

Сол жерде өтініш жазыңыз, құжаттарға баждың төленгенін растайтын түбіртекті тіркеуді ұмытпаңыз.

Процедура қанша тұрады?

Серіктестікті қайта тіркеу үшін баж салығын төлеу керек. 2024 жылы бұл 6,5 АЕК-ті құрайды, бұл 23 998 теңгеге тең.

Процедура қанша уақыт алады?

Процедура барынша жылдам жүзеге асырылады – әдетте, кәсіпкер өтініш берген сәттен бастап бір жұмыс күнінен аспайтын уақыт кетеді.

Қайта тіркеу ең аз уақытты алады және ерекше дайындықты қажет етпейді, сондықтан бұл процедураны елемеуге болмайды. Бұл процедурадан өту бизнесті заңнаманың барлық талабын сақтай отырып, жүргізуге мүмкіндік береді.