ЦентрКредит Банкі Қазақстандағы Альфа-Банкті сатып алады
«Альфа-Банк» АҚ пен «Банк ЦентрКредит» АҚ Қазақстандағы «Альфа-Банк» ЕБ АҚ-ты сату туралы түбегейлі келісімге келді.
ЦентрКредит Банкі жай акциялардың 100%-ын сатып алу арқылы Қазақстандағы Альфа-Банктің жаңа акционері атанады. «Альфа-Банк» АҚ акционерлер құрамынан толық шығып, Директорлар кеңесінің құрамынан өзінің өкілдерін шақыртып алады.
Мәміле заңды тұрғыдан аяқталғаннан кейін ЦентрКредит Банкі Банктің ребрендингін жүргізеді. Осылайша, ол жеке және заңды тұлғаларға арналған барлық банктік қызметтерді көрсететін тұтастай қазақстандық банк болады.
ЦентрКредит Банкі Банкке депозиторлар алдындағы барлық міндеттемелерін орындау және қазіргі кездегі клиенттері үшін орын алған жағдайды шұғыл түрде шешу үшін меншікті қаражатының есебінен қосымша өтімділікпен қолдау көрсетуге дайын.
«Банк ЦентрКредит» АҚ 1988 жылы құрылған және заманауи технологияларды пайдалану арқылы қолайлы банктік өнімдерге бағытталған әмбебап бизнес-модельге негізделген Қазақстанның ең алғашқы әрі ең ірі банктерінің бірі болып табылады. Банктің кең тараған ауқымды филиалдық желісі бар және ол Қазақстанның барлық өңірлеріндегі 130-дан аса бөлімшелері арқылы заңды және жеке тұлғаларға қызмет көрсетеді.