Кофенің сергітетін хош иісі бар бизнес: өзіне-өзі қызмет көрсету кофеханасын ашу жолдары және оның құны

Қазіргі таңда кофе ішу мәдениеті жастар арасында кеңінен дамып келеді, алайда үлкен жастағы адамдар да бұл сергітетін сусынды ұнатады. Сондықтан кофе бизнесі еліміздегі ең әлеуетті бағыттардың бірі болып отыр. Дегенмен бұл саланың өзіндік ерекшеліктері де бар. Қазіргі өмір қарқыны жылдам: адамдардың бос уақыты аз, сәнді кофеханаларға барып отыруға бәрінің бірдей уақыты бола бермейді. Осы себепті өзіне-өзі қызмет көрсету форматындағы кофеханалар алдыңғы қатарға шығады.

Өзіне-өзі қызмет көрсету шағын кофеханасы дегеніміз не?

Мұндай бизнес кофе автоматтарын пайдалануға негізделген. Олар эспрессо мен американо сияқты дәстүрлі сусындардан бастап, латте, капучино, раф сияқты сусындарға дейін кең таңдауды ұсынады. Тұтынушы өз сусынын таңдап, картамен төлем жасап, бір минут ішінде дайын кофесін алады.

Кофе автоматтары бизнесінің бірқатар артықшылығы бар:

• Кофемашиналар автоматты түрде жұмыс істейді – иесі тарапынан тұрақты бақылауды қажет етпейді.
• Локация дұрыс таңдалса, табысты әрі тұрақты бизнеске айналады.
• Егер сапалы әрі дәмді сусын ұсынсаңыз, «ұзынқұлақтан» естіген жарнама тез-ақ тарайды. Бұл кофе аппараттарына негізделген бизнесіңізге танымалдық әкеліп, табысты арттырады

Алайда есте сақтайтын маңызды жайттар да бар. Бұл салада бәсекелестік жоғары. Дегенмен нарыққа қосылу әлі де кеш емес. Дағдарыс кезінде көптеген орын жабылып қалып, кофе бизнесінде өз күшін сынап көргісі келетіндерге мүмкіндік пайда болды. Сонымен қатар бәсекелестерден ерекшелену үшін кофе аппаратына ақшаны үнемдемей, кофенің сапасын ұмытпау маңызды.

Дұрыс локацияны таңдау

Кофе ұсынатын өзіне-өзі қызмет көрсету орны адам көп жүретін жерде орналасқан болса, табысты болады. Сарапшылардың айтуынша, бизнес табысының 90%-ы локацияға байланысты.

Алайда бұл бизнестің өз ерекшеліктері де бар. Мысалы, қоғамдық көлік аялдамаларында адам әрдайым көп болғанымен, олардың көбіне кофе автоматын пайдалануға уақыты жоқ: барлығы автобусты күтіп, кешігіп қалудан қорқады. Сол себепті өзіне-өзі қызмет көрсету кофе бұрышын ойын-сауық және сауда орталықтарында, бизнес-орталықтарда орналастырған дұрыс. Сондай-ақ банк офистерін, ірі тұрғын аудандардағы супермаркеттерді, университеттер мен басқа да оқу орындарын, офис ғимараттарын қарастыруға болады. Бұл орындардың «аудиториясы» үшін кофе әрқашан сұранысқа ие.

Вендинг аппараттарында тұрақты бақылау болмағандықтан, олар бұзақылардың назарына жиі ілігеді. Сондықтан күзет қойылған локацияларды таңдаған жөн.

Бизнеске арналған кофе машинасын таңдаймыз

Жақсы кофемашина да, локацияны дұрыс таңдау сияқты табысқа жетудің маңызды факторы. Кәсіпкердің таңдауы екі нұсқаның біріне түседі: жаңа аппарат алу немесе бұрын қолданыста болғанын сатып алу. Бұрын қолданыста болған аппараттар арзанырақ, бірақ оларды жөндеуге көп ақша жұмсауыңыз мүмкін. Бұрынғы иесі не себепті сатқаны түсініксіз болып қалуы да ықтимал. Сондықтан сарапшылар ісін жаңадан бастағандарға да, тәжірибелі кәсіпкерлерге де жаңа аппарат алған жөн деп кеңес береді.

Біріншіден, жаңа техниканың кепілдігі бар. Екіншіден, әдетте сатушылар сатып алушыларға кеңес беруден бас тартпайды және қызмет көрсетуге жеңілдіктер ұсынады.

Кофепоинттарға арналған аппараттар келесі санаттарға бөлінеді:

• Эконом-сегмент. Бұл – ең қарапайым, функциясы аз нұсқа.
• Орташа баға санаты. Мұндай кофемашиналардың интерфейсі түсінікті – алғаш рет келген сатып алушының өзі де оңай пайдалана алады. Сонымен қатар мүмкіндіктері де көбірек.
• Премиум. Бұл аппарат – бизнесін кеңейтіп жатқан және тәжірибесі бар кәсіпкерлер үшін ең қолайлы нұсқа.

Аппараттардан ақшаны үнемі алып тұруды (егер төлем қолма-қол ақшамен жүргізілсе), сондай-ақ ингредиенттерді толықтырып отыруды ұмытпаңыз. Бизнес алғаш даму кезеңінде болғанда, бұл міндеттерді кәсіп иесінің өзі атқара алады. Ал егер бизнес ауқымы кеңейіп жатса, қызметкер жалдау туралы ойланған жөн. Айтпақшы, қолма-қол ақшаны алып, аппаратты қайта толықтырудың оңтайлы мерзімі – үш күнде бір рет.

Қанша қаражат салу қажет?

Шағын үстел аппараттарын 900 мың-1,3 миллион теңге аралығында табуға болады. Функциялары көбірек модельдердің бағасы 1,5–1,7 миллион теңге шамасында. Бұл – үлкен стақандармен (250 мл немесе 350 мл) жұмыс істейтін қуатты техника. Бір аппаратқа 1,5 кг астам кофе дәні және шамамен 80 стақан сыяды.

Еденге орнатылатын кофепоинттарға кемінде 2 миллион теңге инвестиция салу қажет. Бұл үлгілерге аппарат қана емес, сонымен қатар шәрбаттарға арналған сөрелер де кіреді, ал кейбір құрылғылар тіпті кофенің бетіне сурет «басып шығаруға» қабілетті. Сондай-ақ ыдыс, сүт және кілегей секілді қосымша ингредиенттердің құнын да ескерген жөн. Бизнес бастапқы кезеңде айына 200 мыңнан 700 мың теңгеге дейін пайда әкеле алады. Кофепоинттың өзін-өзі ақтау мерзімі — шамамен 5 ай.

Франшиза бойынша өзіңізбен бірге ала кететін кофе

Егер өз кофепоинтыңызды ілгерілетуге күш салғыңыз келмесе, бұрыннан танымал өзіне-өзі қызмет көрсету кофеханаларының франшизасын сатып алу мүмкіндігін қарастырыңыз. Сіз жарнамаланған дайын брендке ие болып, барлық сұрағыңыз бойынша қолдау көрсетіледі. Бұл – бизнесті заңдастыру бойынша көмек (мысалы, ЖК ашу), маркетингтік сүйемелдеу, сондай-ақ сенімді кофе өндірушілерден өнімді тұрақты түрде жеткізіп отыру. Мысалы, Coffeebox, Eazy Coffee, Alash Coffee, Zhan Coffee, EspressoDay өзін-өзі қызмет көрсету кофеханалары франшизаларын ұсынады. Мұндай бизнес-жобаға инвестиция салу әдетте 3,2 миллион теңгеден басталады.

Өзіне-өзі қызмет көрсету кофеханасын ашу жайында ең алдымен кәсіпкерлікпен енді ғана айналыса бастағандар ойланғаны жөн. Жобаның бастапқы кезеңінде бұл бизнесті негізгі жұмыспен қатар алып жүруге болады. Болашақта кофепоинтты толыққанды, ыңғайлы кофеханаға айналдыруға болады, онда қонақтарға отыратын орындар да болады. Кофепоинт — тәжірибелі кәсіпкерлер үшін де тамаша қосымша бизнес мүмкіндігі: бірнеше толыққанды кофеханамен жұмыс істеп, танымал локацияларда бір-екі орын ашуға болады.