VIP санаты: Қазақстанда көлікке арналған әдемі нөмірлер қанша тұрады және оларға қалай тапсырыс беруге болады?

Әр автокөлікке нақты бір мемлекеттік тіркеу нөмірі белгісі (МТНБ) бекітіледі. Бұл көлік құралын сәйкестендіру үшін қажет. Мысалы, жол-көлік оқиғасы болса, кінәлі автокөлік дәл осы нөмір арқылы анықталады.

Көлік нөмірлері: «жай» немесе «әдемі» нөмірлер

Нөмір алудың стандарт процедурасы мынадай жолмен жүзеге асады. Жүргізуші өз қаласындағы Мамандандырылған халыққа қызмет көрсету орталығына барып, сол жерде ұсынылатын нөмірлер тізімінен таңдау жасайды. Бұл — «жай» нөмірлер, яғни олардың құрамында ерекше немесе есте қаларлық цифрлар мен әріптер жоқ, комбинациялар кездейсоқ ретпен берілген. Егер көлік иесінің нөмірге қатысты арнайы талабы болмаса, ұсынылған нөмірді таңдап, мемлекеттік баж салығын төлейді. Мұндай нөмірдің баж салығы — 2,8 АЕК (2025 жылы бұл 11 009,6 теңгеге тең).

Алайда белгілі бір сандар комбинациясына маңыз беретін көлік иелері де бар. Кейбіреулер үшін бұл сандар есте қаларлық оқиғалармен байланысты, ал басқалары нөмірді есте сақтау оңай болғанын қалайды. Тағы бір бөлігі көлікті ауыстырғанымен, алғашқы нөмірін сақтап қалғысы келеді.

VIP деп есептелетін автокөлік нөмірлері

Қазақстанда VIP санатындағы көлік нөмірлеріне мыналар жатады:

• Бірдей әріптері бар кездейсоқ цифрлар комбинациясы (618SSS07).
• Нөлдер мен/немесе қайталанатын цифрлардан тұратын комбинациялар (090TBI13, 077HBN01).
• Нөлдер, бірдей цифрлар және бірдей әріптер комбинациясы (020KKK05, 707DDD02).
• «Дөңгелек» немесе бірдей сандар (200NCG15, 666LKV08).
• «Дөңгелек» немесе бірдей сандар мен бірдей әріптердің комбинациясы (200NNN15, 666LLL08).
• Алдыңғы екі нөл немесе 777 саны бар нөмірлер (001DSC01, 777IGV02).
• Алдыңғы екі нөл немесе 777 саны және қайталанатын әріптері бар нөмірлер (001DDD01, 777XXX02).

Барлық цифр мен әріпті таңдауға бола ма?

Цифр мәселесінде бәрі түсінікті. Нөмірді стандарт тізімнен таңдап алуға немесе «әдемі» комбинацияларды таңдауға болады. Бірақ әріптермен де «эксперимент» жасауға мүмкіндік бар.

Егер сізге «әдемі» әріптер қажет болса (мысалы, қайталанатын DDD әріптері), онда бұған («ерекше» нөмірлермен бірге) қосымша ақы төлеуге тура келеді. Ал егер сізге басқа комбинация керек болса (мысалы, аты-жөніңіздің бірінші әріптері), онда кез келген әріптер комбинациясын еркін таңдай аласыз. Бұл қызмет тегін. Егер әріптер мен цифрлардың белгілі бір комбинациясы бос болса, онда сізге дәл сол нөмір беріледі.

Алайда белгілі бір шектеулер бар: жүйе дөрекі, бейәдеп немесе сондай сөздерді еске түсіретін әріптік комбинацияларды автоматты түрде бұғаттайды (мысалы, ОРG комбинациясы ОПГ-ға ұқсайды, яғни «ұйымдасқан қылмыстық топ» дегенді білдіреді). Мұндай тыйым салынған комбинациялар саны жүзден асады.

Сондай-ақ көлік иесі өңір кодына әсер ете алмайды. Бұл код автокөлік тіркелетін жеріне қарай автоматты түрде беріледі. Мысалы, Астана қ. арналған код — 01, Алматы қ. арналған — 02, Алматы обл. арналған код — 05, ал Павлодар обл. арналған код— 14.

Қазақстанда автокөлікке арналған әдемі мемлекеттік нөмірлердің бағасы қандай?

Көлігіне мәртебелі нөмір тағуды қалайтын адам оның құны қарапайым нөмірлерге қарағанда әлдеқайда жоғары болатынына дайын болуы керек. Қазақстанда көлікке арналған әдемі нөмірлердің бағасы таңдалған цифрлар мен әріптердің комбинациясына байланысты өзгереді:

• Кездейсоқ жасалған цифрлар мен бірдей әріптерден тұратын нөмірлердің (618SSS07) құны — 57 АЕК (2025 жылы 224 124 теңге). Дәл осындай баға нөлдермен және/немесе қайталанатын цифрлармен келетін комбинациялар үшін де белгіленген (090TBI13, 077HBN01).
• Нөлдер, бірдей цифрлар мен бірдей әріптерден құралған комбинациялардың (020KKK05, 707DDD02) құны — 114 АЕК, яғни 448 248 теңге.
• «Дөңгелек» немесе қайталанатын сандар (200NCG15, 666LKV08) одан да қымбат — 137 АЕК (538 684 теңге).
• «Дөңгелек» немесе бірдей сандар мен бірдей әріптерден тұратын комбинациялар (200NNN15, 666LLL08) 194 АЕК немесе 762 808 теңге тұрады.
• Алдыңғы екі саны нөл немесе құрамында 777 бар нөмірлердің (001DSC01, 777IGV02) құны — 228 АЕК (896 496 теңге).
• Ең қымбат нұсқа — алдыңғы екі саны нөл немесе 777 және бірдей әріптермен бірге келетін нөмірлер (001DDD01, 777XXX02). Мұндай нөмір үшін 285 АЕК немесе 1 120 620 теңге төлеуге тура келеді.

Қазақстанда автокөлікке арналған әдемі мемлекеттік нөмірге тапсырыс беру және сатып алу жолдары

Мемлекеттік нөмірді онлайн режимінде таңдауға, брондауға және ақысын төлеуге болады. Бұл қызмет eGov.kz электрондық үкімет порталында, сондай-ақ eGov Mobile қолданбасында ұсынылған. Әдемі комбинацияны таңдап қойған болсаңыз, оның ақысын дереу төлеу қажет. Төлем жүргізілген соң, нөмір сіздің атыңызға тіркеледі.

Сол сияқты барлық операцияны ЦентрКредит Банкі ұсынатын bcc.kz қолданбасындағы мемлекеттік қызметтер сервисі арқылы да жүргізуге болады. Қалаған комбинацияны көрсетіңіз, оның бос екенін тексеріңіз және төлем жасаңыз. Енді әдемі нөмір — сіздікі.

Автокөлікке арналған VIP-нөмірді жылдам алу жолдары

«Стандарт» нөмір белгілері дереу берілсе, әдемі нөмірлерді алу үшін біраз күтуге тура келеді. Мысалы, Астана мен Алматы қалаларындағы көлік иелері нөмірлерін 5 жұмыс күні ішінде алады. Ал басқа қалалар мен облыстардың (мысалы, Шымкент) тұрғындарының біраз күте тұруына тура келеді, себебі күту уақыты 15 жұмыс күніне дейін созылуы мүмкін.

Сонымен қатар VIP-нөмірді дайындау процедурасын жылдамдату мүмкін емес екенін ескерген жөн. Мұндай опция қарастырылмаған.