Демалысқа! 2024 жылдың жазында Қазақстаннан қайда демалуға баруға болады және не көруге болады

Жаз дегеніміз – шағын ғана өмір. Оны көңілді әрі баянды етіп өткізгіміз келеді. Мұндай мүмкіндікті қазақстандық туристік агенттіктер ұсынады: ондаған бағыттың ішінен күш жинап алуға немесе тіпті арманыңызды іске асыруға жол ашатын бағыт міндетті түрде табылады. Сонымен, шілде мен тамызда Қазақстаннан қайда демалуға баруға болады?

Теңізге: жағажайдағы демалыс 

Көптеген адамдар жазда Қазақстаннан қайда баруға болады деген сұраққа бірауыздан «теңізге» деп жауап береді. Жағажайдағы демалыс – ең бір сұранысқа ие бағыттардың бірі. Оның үстіне Түркия, Грузия және Таиланд сияқты елдер мен Қазақстанның арасында визасыз режим болғандықтан, бұл сапарға дайындықты жеңілдетеді.

Көптеген адамдар жазда Қазақстаннан қайда баруға болады деген сұраққа бірауыздан «теңізге» деп жауап береді. Жағажайдағы демалыс – ең бір сұранысқа ие бағыттардың бірі. Оның үстіне Түркия, Грузия және Таиланд сияқты елдер мен Қазақстанның арасында визасыз режим болғандықтан, бұл сапарға дайындықты жеңілдетеді.

Түркияда сізді қалалардың керемет мәдени айқын көрінісі, ақ пейілді жергілікті тұрғындар, дәмді тағам, жылы теңіз күтеді, мұндайдан бас тарту қиын. Түрік мейманханаларының көпшілігі демалушыларға all inclusive ұсынады: демалыста тамақ әзірлеу жайында алаңдаудың немесе кафелер мен мейрамханаларға ақша жұмсаудың қажеті жоқ. Жағажайдағы демалысты қызықты ойын-сауықпен (шөл далада түйеге мініп қыдырудан су түбіне сүңгуге дейін) және еліктірер экскурсиялармен түрлендіруге болады. Стамбулдағы Көгілдір мешітті, ежелгі Сиде қаласын немесе Каппадокиядағы Гёреме алқабын көру ғанибетінен бас тартпаңыз, онда жартастар аясында осы аймақтың төлқұжаты іспеттес ашық түсті әуе шарлары аспанға қалықтай ұшады.

Грузия – теңіздегі демалысты тауға шығумен және ежелгі көрнекі жерлерге барумен толықтырғысы келетіндер таңдауға болатын жер. Хачапури, хинкали, харчо көжесі және чурчхела сияқты жергілікті тағамдар туралы ұмытпаңыз. Әрбір турист климаты қолайлы аймақты таңдай алады: мысалы, Қара теңіз жағалауында (Кобулети, Батуми) жазда температура +25–30 градус болып тұрады, ал тауларда (Казбеги, Сванети) салқынырақ: +20-дан +25-ке дейін. Қазақстаннан Грузияға ұшу 4 сағаттан аспайды, ал кейбір жағдайларда (мысалы, Ақтаудан Кутаисиге) 2 сағаттан аз уақыт кетеді. Бұл – 3, 4 немесе 5 күн демалуға баратын жер іздейтіндер үшін тамаша нұсқа. Грузия аумағында қазақстандықтар визасыз 365 күн бола алады.

Тағы бір танымал бағыт – Таиланд, мұнда туристерді ақ құм мен көгілдір түсті суы бар экзотикалық жағажайлар, мол тағам, көптеген ойын-сауық шаралары, соның ішінде қызыққа толы түнгі өмір күтеді. Мәдени мұра – шаршаған жолаушыларға тыныштық пен жайлы күй сыйлайтын өте әдемі будда храмдары туралы ұмытпаған жөн. Сәуірден қазанға дейін Таиландта жаңбырлы маусым орнайды, бірақ бұл туристер үшін қолайлы, өйткені тұрғын үйдің бағасы төмендеп, су мөлдір бола түседі, бұл су түбіне сүңгуге қолайлы жағдай туғызады. Бұл ретте ауа райы жайлы болып тұра береді, ал шуақты күндер жағажайда алаңсыз демалуға мүмкіндік береді. Күнге күю мен мейлінше шомылуды маңызды санайтын адамдар үшін Паттайя немесе Ко Чангты таңдаған дұрыс, ал егер атмосфералық сауық кештеріне барғыңыз келсе, Бангкокқа барыңыз.

Жазда жаңбырлы маусым тағы бір жерде – Мальдив аралдарында болады. Мұнда барынша тиімді ең үздік сервисті пайдаланып, керемет табиғатты тамашалай аласыз. Аралдар ең алдымен жағажайдағы демалысын судағы үздіксіз ойын-сауықпен ұштастырғанды жақсы көретіндер үшін қызықты. Алматыдан Малеге ұшу 10 сағаттан астам уақытты алады, есесіне қазақстандықтар бұл елде визасыз 30 күнге дейін бола алады.

Жағажайдағы демалыс үшін адамды ежелгі қалаларымен және көркем тауларымен баурайтын Черногорияны, ойын-сауық пен үлкен сауда орталығы – БАӘ-ні, сондай-ақ бедуиннің өмір салтын ұстанып көруді ұсынатын Катарды қарастырған жөн. Вьетнамға, Шри-Ланкаға немесе Грецияға да назар аударыңыз.

Экскурсияға: айрықша әсер алу, танымды арттыру

Егер қала көшелерімен серуендеуді ұнатсаңыз, онда биыл демалуға баруға болатын тамаша жер – мәдени мұраға бай, әлемге әйгілі көрнекі жерлері мен ұлттық тағамдары мол Еуропа.

Париждегі Эйфель мұнарасы, Сакре-Кёр шіркеуі және Монмартр белесі – бүкіл Франция бұлармен шектелмейді. Прованс өлкесін зерттеңіз, мұнда сізді ескі кемежайы бар, қозғалысқа толы керемет әдемі Марсель қаласы мен жазда концерттерімен және театр қойылымдарымен сан алуан бояуға толы музыка фестивалі өткізілетін Авиньон қаласы күтеді. Салқын климатты ұнататындардың сәулетті Руан қаласы мен жайлы курортты Довиль қаласы бар Нормандияны көргені жөн. Франция әдетте құрама турға кіреді, демек, сіз бірден бірнеше елмен (мысалы, Бельгия, Германия немесе Голландия) таныса аласыз.

Ортағасырлық қамалдар атмосферасына ынтық романтиктер мен емдік минералды бұлақтарды қастерлеушілерге Чехияның ұнары сөзсіз. Мұнда ауа райы жазда жаяу серуендеуге ыңғайлы және сансыз көп көше кафелерінің бірінде демалуға (және, әрине, сиыр еті мен жергілікті сыраның дәмін татуға) болады. Чехия жазы – музыкалық фестивальдар маусымы. Мысалы, тамыз айының соңында елдегі чех Вудстогы деп аталатын ең көне Open Air Trutnov фестиваліне баруға болады.

Қазақстандықтар 2024 жылы демалуға баратын тағы бір танымал Еуропа елі – Италия. Бұл Римдегі Колизей амфитеатры мен Треви субұрқағы ғана емес. Альпі тау шыңдарынан әсер алып, Амальфи қаласының әсем көрінісінен шабыт алыңыз, Сардиния аралының көгілдір суына шомылыңыз немесе Бураноға барыңыз, онда ашықхаттарда суреттелетіндей сан алуан түрлі түсті үйлер бар. Венеция мен Флоренцияның аса бай мұрасы туралы да ұмытпаңыз.

Еуропаның басқа елдері де назар аударуға тұрарлық. Болгарияда тау шаңғысы курорттары мен жайлы құмды жағажайлар, минералды бұлақтар бар. Испания Гаудидің туындыларымен жақынырақ танысуға және музыка мен биге толы кештер атмосферасына бойлауға мүмкіндік береді. Мұнда маусым айында аңызға айналған бұқа жарысы (Памплонада), ал тамыз айының соңында әйгілі «Томатина» қызанақ фестивалі (Буньолада) өтеді. Германия өзінің өркендеген мегаполистерімен, Альпінің керемет сұлулығымен және көптеген фестивальдарымен баурайды. Мысалы, шілде айында Melt Festival өтеді, ол өтетін жерімен есте қалады: бұл – бұрынғы көмір шахтасы. Тамыз айының басында Хернде аттракциондар мен кез келген талғамға ұсынылатын көше тағамдары бар Еуропадағы ең үлкен жәрмеңке – Cranger Kirmes өтеді, ал тамыздың соңы – компьютер ойындарын жақсы көретіндердің сүйікті мезгілі, өйткені Кёльн қаласында ең ауқымды бейнеойын көрмелерінің бірі – Gamescom өтеді.

Экзотика: сіз әлі көрмеген нәрсе 

Ал 2024 жылы Қазақстаннан курорттарға барып, Еуропаның көрнекі жерлерімен танысқандарға демалуға қайда баруға болады?

Сейшел аралдарында суда жүзу керемет суасты әлеміне бойлап, оны мекендеушілерді өз көзіңізбен көруге мүмкіндік береді. Мұнда мамыр айынан бастап қазан айына дейін ауа райы қолайлы, су +27 градусқа дейін жылиды, бұл аралды судағы ойын-сауықты жақсы көретіндер үшін жұмаққа айналдырады. Мұндай демалысты үнемді деп айту қиын, ал бір ұшақтан келесісіне ауысып ұшуға шамамен бір тәулік кетеді, бірақ алатын әсер соған тұрарлық.

Тағы бір экзотикалық бағыт – Занзибар. Бұл аралдар тобы Танзанияның құрамына кіреді, мұнда туристер маржан кедертасын, аппақ жағажайды, керемет көкшіл аспанды және көкжиекпен астасқан көгілдір су айдынын тамашалай алады. Аралдағы ойын-сауық стандартты курорттар ұсынатын ойын-сауықтан өзгеше: мұнда аквариумда алып балықтармен бірге жүзуге, дәмдеуіштер фермаларына барып, сафариге қатысуға, тіпті Тасбақалар аралында үлкен тасбақаны ұстап көруге болады.

Куба болса туристерін суреттегідей жағажайларымен, судағы ойын-сауықпен, жергілікті ерекшелігімен және көңілді фестивальдарымен тәнті етеді. Бостандық аралында әлемдегі ең танымал жағажайлардың бірі Варадеро бар.

Жағажайлары бар тағы бір экзотикалық жер – Доминикан, оған 15 сағаттан астам ұшу керек. Таңғажайып табиғат көріністері, тап-таза Пунта-Кана мен Санто-Доминго жағажайлары, шулы сарқырамалар және көптеген аквапарктер бұл ұшуға кеткен уақыттың орнын он есе толтырады. Сатып алуды жақсы көретіндер Agora Mall және Sambil Santo Domingo сияқты аса үлкен сауда орталықтарына лайықты бағасын береді, ал аймақтың табиғатымен ұлттық саябақтарда (мысалы, Лос Трес Охос) жақынырақ таныса аласыз.

Егер демалуға қайда бару керектігін ойластырып, экзотикалық жерлерді таңдасаңыз, онда билет бағасы арзан болады деп үміттенбеген жөн.

Демалысты қалай барынша жайлы ету керек?

Сапарға дайындалудың маңызды сәті: шетелге шығуға тыйым салынбағанын тексеруді ұмытпаңыз. Тыйымның қылмыстық іске қатысушы болсаңыз ғана салынбайтынын ескеріңіз: борыш та (мысалы, төленбеген айыппұл немесе коммуналдық қызмет ақысы, алимент) демалысқа кедергі болуы мүмкін. Мәртебеңізді тексеруге неғұрлым тезірек кіріссеңіз, борышыңызды өтеуге соғұрлым көп уақытыңыз болады. Демек, демалыс жоспарлағаныңыздай өтеді. Bon voyage!